ਡੇਟਲਾਈਨ ਬਿਊਰੋ
ਕੈਨਬਰਾ: ਆਸਟ੍ਰੇਲੀਆ ਦੀ ਸੰਘੀ ਸਰਕਾਰ ਦੇ ਇੱਕ ਨਵੇਂ ਵਿਸਤ੍ਰਿਤ ਵਿਸ਼ਲੇਸ਼ਣ ਅਨੁਸਾਰ, ਉੱਤਰੀ ਆਸਟ੍ਰੇਲੀਆ, ਦੂਰ-ਦੁਰਾਡੇ ਦੇ ਭਾਈਚਾਰਿਆਂ ਅਤੇ ਵੱਡੇ ਸ਼ਹਿਰਾਂ ਦੇ ਬਾਹਰੀ ਇਲਾਕੇ 2050 ਤੱਕ ਗਰਮੀ ਦੀਆਂ ਲਹਿਰਾਂ (ਹੀਟਵੇਵ) ਤੱਟਵਰਤੀ ਹੜ੍ਹਾਂ ਅਤੇ ਹੋਰ ਮੌਸਮੀ ਤਬਦੀਲੀਆਂ ਦੇ ਖਤਰਿਆਂ ਲਈ ਖਾਸ ਤੌਰ ‘ਤੇ ਸੰਵੇਦਨਸ਼ੀਲ ਹੋਣਗੇ।
ਦੇਸ਼ ਦੇ ਪਹਿਲੇ ਵਿਆਪਕ ਮੌਸਮੀ ਖਤਰੇ ਦੇ ਵਿਸ਼ਲੇਸ਼ਣ ਨੇ ਗਲੋਬਲ ਵਾਰਮਿੰਗ ਦੇ 1.5, 2 ਅਤੇ 3-ਡਿਗਰੀ ਦੇ ਵੱਖ-ਵੱਖ ਸਥਿਤੀਆਂ ਵਿੱਚ ਵੱਖ-ਵੱਖ ਭਾਈਚਾਰਿਆਂ ਅਤੇ ਖੇਤਰਾਂ ‘ਤੇ ਪੈਣ ਵਾਲੇ ਪ੍ਰਭਾਵਾਂ ਦਾ ਅਧਿਐਨ ਕੀਤਾ ਹੈ। ਮੌਜੂਦਾ ਨੀਤੀਆਂ ਦੇ ਤਹਿਤ, 2050 ਤੱਕ ਸਾਰੇ ਖਤਰੇ ਜਾਂ ਤਾਂ ਬਹੁਤ ਜ਼ਿਆਦਾ ਜਾਂ ਗੰਭੀਰ ਪੱਧਰ ‘ਤੇ ਹੋਣਗੇ।
ਰਿਪੋਰਟ ਵਿੱਚ ਪਾਇਆ ਗਿਆ ਹੈ ਕਿ ਜੇਕਰ ਧਰਤੀ ਦਾ ਤਾਪਮਾਨ 3 ਡਿਗਰੀ ਵਧਦਾ ਹੈ, ਤਾਂ ਸਿਡਨੀ ਵਿੱਚ ਸਿਰਫ ਬਹੁਤ ਜ਼ਿਆਦਾ ਗਰਮੀ ਨਾਲ ਹੋਣ ਵਾਲੀਆਂ ਮੌਤਾਂ ਵਿੱਚ 444 ਪ੍ਰਤੀਸ਼ਤ ਤੱਕ ਦਾ ਵਾਧਾ ਹੋ ਸਕਦਾ ਹੈ। ਇਸ ਤੋਂ ਇਲਾਵਾ, ਤੱਟਵਰਤੀ ਹੜ੍ਹਾਂ ਅਤੇ ਸਮੁੰਦਰੀ ਪੱਧਰ ਦੇ ਵਧਣ ਵਰਗੇ ਖਤਰਿਆਂ ਕਾਰਨ ਲਗਭਗ ਤਿੰਨ ਮਿਲੀਅਨ ਲੋਕ ਬਹੁਤ ਉੱਚ ਜੋਖਮ ‘ਤੇ ਹੋਣਗੇ।
